Shkup, 2 tetor 2021
Teknologjitë e reja krijojnë vende të reja pune dhe nevojë për kualifikime dhe aftësi të reja. Është e rëndësishme gjatë studimeve, profesionistët e rinj të fitojnë aftësi të cilat do t’u mundësojnë të kyçen më shpejtë në tregun e punës pas përfundimit të studimeve. Këtë ua rekomandoi studentëve të vitit të parë në Fakultetin ekonomik në Universitetin “Shën Kirili dhe Metodij” në Shkup, guvernatorja, Anita Angelovska-Bezhoska në eventin e organizuar nga fakulteti me rastin e fillimit të vitit të ri akademik. Ajo vuri në dukje se ekipi i Bankës Popullore do t'i ndihmojë ata në këtë proces përmes ligjëratave tematike dhe punës praktike.
- Digjitalizimi formëson të ardhmen e vendeve të punës. Teknologjitë e reja krijojnë vende të reja pune në fushën e inteligjencës artificiale, analizës së të dhënave, marketingut digjital, zhvillimit të biznesit dhe inovacionit teknologjik në sektorin financiar. Të gjitha këto aspekte lidhen me studimet që keni zgjedhur - tha Angelovska-Bezhoska.
Guvernatorja vuri në dukje se në mjedisin e ri dhe dinamik nevojat për burime njerëzore të bankave qendrore po ndryshojnë në përputhje me ndryshimet në ekonominë reale dhe sektorin financiar. Në këtë kontekst, siç tha ajo, nevoja për njohuri teorike dhe praktike të metodave dhe modeleve sasiore shprehet gjithnjë e më shumë, si bazë për konceptimin e duhur të politikave të bankës qendrore dhe arritjen e qëllimeve themelore - stabilitetin e çmimeve dhe stabilitetin financiar.
- Ashtu si deri më tani, ekipi i bankës qendrore do të përfshihet në mënyrë aktive në plotësimin e aftësive dhe njohurive tuaja, përmes ligjëratave tematike në fakultetin tuaj dhe punës praktike që ne organizojmë në kuadër të Bankës Popullore - tha Angelovska-Bezhoska.
Banka Popullore dhe Fakulteti ekonomik, në qershor të këtij viti, nënshkruan memorandum me qëllim forcimin e bashkëpunimit me investime të përbashkëta në hulumtimet dhe krijimin e stafit cilësor. Bashkëpunimi i referohet gjithashtu konceptimit të programeve të reja të studimit, me përfshirje aktive të Bankës Popullore në drejtim të njohurive dhe aftësive në fushën e politikës monetare dhe makroekonomike dhe sistemit bankar.
Në eventin e Fakultetin ekonomik, përveç guvernatorës së Bankës Popullore, fjalën e morën edhe rektori i Universitetit "Shën Kirili dhe Metodij” në Shkup, Prof.Dr. Nikolla Jankulovski, dekani i Fakultetit ekonomik, Prof.Dr. Predrag Trpeski dhe presidentja e Bordit të drejtorëve dhe drejtoresha ekzekutive e “UNI Bank”, Milka Todorova.