Почитуван министре Оливер Спасовски, ваши екселенции Самуел Жбогар и Томас Герберих, почитувани проектни лидери Билјана Целеска-Аневска и Петар Спика, почитуван г. Дамир Бичаниќ, ценети претставници на Делегацијата на Европската Унија во земјава и претставници на Министерството за внатрешни работи, уважени колеги, драги гости,

Ми претставува чест и задоволство да ве поздравам во името на Народната банка и да ви посакам добредојде на денешниов настан кој се одржува во нашата институција, со кој заеднички го означуваме почетокот на овој мошне значаен твининг лајт проект насочен кон зајакнување на капацитетите на институциите вклучени во системот за борба против фалсификување на еврото.

На самиот почеток на моево обраќање би сакала да ја изразам благодарноста на Народната банка упатена до Европската Унија, затоа што ја препозна решеноста на нашите клучни институции за борба против фалсификувањето пари да го вложат својот максимум во воспоставувањето цврст и ефикасен систем за заштита на националните финансиски интереси и на финансиските интереси на Унијата. Да се заблагодарам, затоа што со издвојувањето средства од своите претпристапни фондови за спроведување на овој проект, ни укажа и доверба дека сме подготвени да работиме на јакнење на институционалниот потенцијал и меѓусебната соработка за да ги спроведеме препораките коишто ќе произлезат од проектните активности.

Сигурна сум дека довербата ќе ја оправдаме. Не само со степенот на нашата посветеност на Проектот во следните осум месеци, туку и со подготвеноста за спроведување на сите потребни активности за воспоставување цврст и ефикасен систем за борба против фалсификувањето евра во земјава. Овие активности веќе се зацртани во стратегиските определби на нашите институции, бидејќи наша крајна цел е да обезбедиме систем кој од сите аспекти ќе биде на ниво на систем на земја членка на Европската Унија. Само така, со целосна посветеност, подготвеност и професионализам, довербата ќе биде целосно оправдана и ќе потврдиме дека Проектот навистина бил успешен – дека средствата во износ од 250,000 евра наменети за неговото спроведување биле насочени во вистинска насока.

Цврсто сум убедена дека Министерството за внатрешни работи и ние од Народната банка, како корисници на овој проект, заеднички ќе успееме во тоа. Убедена сум и заради досегашната успешна соработка меѓу двете институции, што се покажа како мошне ефикасна во спречување на појавата и распространувањето на фалсификувани пари на територијата на нашата држава, и заради нашата подготвеност и во иднина заеднички да продолжиме да се справуваме со предизвиците во овој сегмент од нашето работење.

Определбата на Народната банка сигурно да чекори по патот кон Европскиот систем на централни банки, постојано следејќи ги европските стандарди и практики и унапредувајќи ги сите сегменти на своето работење, претставува една од главните стратегиски цели. Токму затоа ве уверувам дека со истиот степен на професионализам и посветеност со кој пристапуваме кон другите предизвици, пристапуваме и кон спроведувањето на овој проект и ќе го дадеме својот максимален придонес во спроведувањето на активностите коишто ќе треба да следат по неговото завршување.

Искрено се надеваме дека брзо по влезот на земјава во ЕУ, интегритетот на еврото ќе го штитиме и како интегритет на домашна валута. Впрочем, токму затоа Законот за Народната банка веќе содржи одредби со кои се регулирани задачите и овластувањата на нашата институција од денот на пристапувањето на нашата земја во Европската Унија, како и задачите и овластувањата коишто ќе ги имаме по воведувањето на еврото како национална парична единица. Оттука, овој проект и неговата успешност ги перципираме и како долгорочна клучна инвестиција во еден значаен сегмент од нашето работење.

Но, на долг рок овој проект истовремено ќе биде и инвестиција за унапредување на работењето не само на Народната банка и Министерството за внатрешни работи туку посредно и на другите институции коишто активно се вклучени во системот за борба против фалсификувањето пари: Царинската управа, Управата за финансиска полиција при Министерството за финансии, Основното јавно обвинителство и судските органи. Верувам дека по спроведувањето на овој проект, нашата меѓуинституционална соработка во доменот на следење и спречување фалсификување банкноти и монети, дополнително ќе се развива. Верувам и дека многу скоро по завршување на проектните активности заеднички ќе можеме да констатираме и да соопштиме дека нашиот национален систем за борба против фалсификување веќе е на повисоко ниво, компатибилен на системите на земјите членки на Европската Унија.

Во завршницата на моево обраќање сакам да потенцирам дека ме радува фактот што во овој проект, како твининг партнери имаме и две од постарите земји членки на Европската Унија – Германија и Австрија. Поаѓајќи од фактот дека тие се директни учесници во носењето на политиките и во совладувањето на сите предизвици сврзани со еврото од неговото воведување пред дваесет години до денес, верувам дека во комуникацијата и соработката со нивните експерти ќе се стекнеме со  сознанија коишто ќе ни бидат од голема корист во процесот на јакнење на нашите капацитети. Но, исто толку ме радува што партнер во овој проект ни е и најновата земја членка на ЕУ – Хрватска, бидејќи за нас како институции на земја кандидат за членство, од особена важност ни се и искуствата на овие експерти од процесот на усогласување на националната со европската регулатива во сферата на борбата со фалсификувањето. Верувам дека во рамки на проектните активности тие искуства ќе ни бидат пренесени на најпрофесионално ниво.  

Затоа, во име на Народната банка изразувам голема благодарност и до колегите од Дојче бундесбанк, и до колегите од хрватската и од австриската централна банка. Со сите нив, како и со повеќето централни банки од земјите членки на ЕУ, веќе имаме воспоставено конструктивна соработка во повеќе области, што е значајно за јакнење на капацитетите на Народната банка за приклучување кон Европскиот систем на централни банки. Денешниот настан и овој твининг лајт проект е најнов, но не и последен во низата. Се надевам дека во таа низа ќе се вброи и настанот на кој ќе содејствуваме во подготовката на нашата земја за прифаќање на еврото како национална парична единица и за пристапување на Народната банка во евросистемот.

За денот кога тој настан повеќе нема да биде само наш сон, туку и дел од нашата реалност, Народната банка и натаму ќе го унапредува извршувањето на своите цели и задачи, во согласност со европските стандарди и најдобри практики, што е од исклучителна важност за натамошниот процес на прием на земјава во членството на Европската Унија. Затоа, ве уверувам дека ние, раководството и вработените во Народната банка, максимално ќе бидеме посветени на овој проект, отворено и конструктивно ќе соработуваме во текот на спроведувањето на сите проектни активности и оваа можност што ни ја дава Европската Унија ќе ја искористиме за понатамошно зајакнување на капацитетот и кредибилитетот на нашата институција. 

На крајот на моево обраќање, дозволете ми да им посакам успешна работа на проектните лидери и на сите експерти што учествуваат во Проектот. Верувам дека по осум месеци ќе можеме да резимираме еден успешно завршен проект, а во периодот потоа, откако ќе ги спроведеме добиените препораки, и да испишеме уште една од многуте историски страници за придонесот на нашите институции за европските интегративни процеси на нашата земја.

Ви благодарам!