Врз основа на Одлуката за објавување конкурс за изработка на едукативна игра (веб/мобилна апликација) и одобрување средства O бр. 415/1 од 4 јануари 2018 година Народната банка на Република Македонија објавува
КОНКУРС
за изработка на едукативна игра (веб/мобилна апликација)
Со цел поттикнување поголем интерес за знаења од областа на економијата и финансиите, Народната банка на Република Македонија (во натамошниот текст: Народната банка) објавува Конкурс за изработка на едукативна игра (веб/мобилна апликација).
Едукативната игра (веб/мобилна апликација) ќе биде наменета за пошироката јавност, а пред сè за младата популација. Преку играта младите ќе имаат можност да се забавуваат, да створат поголем интерес за областа на економијата и финансиите и да го збогатат сопственото знаење. Едукативната игра треба да биде создадена согласно со возраста на целната група, односно ликовите, цртежите, содржината, јазикот и сл. да бидат приспособени на: група I (деца од 6 до 12 години), група II (млади од 13 до 18 години) и група III (возрасно население 18+).
Изработката на најдобра едукативна игра ќе се спроведе во две фази:
- Во првата фаза авторите треба да изработат идејно решение во рок од еден месец од објавата на Конкурсот; и
- Во втората фаза авторите треба да изработат едукативна игра (веб/мобилна апликација) во рок од три месеци од прифатеното идејно решение.
Во првата фаза се очекува авторите да достават идејно решение во кое ќе биде опишана едукативна игра (веб/мобилна апликација) преку слики и текстуално. Секој автор што ќе достави идејно решение коешто ќе биде прифатено од страна на Комисијата за избор на едукативна игра, ќе се смета дека ги прифаќа условите наведени во Конкурсот, меѓу кои и тоа дека со самото учество, без разлика дали ќе биде наградена неговaтa едукативна игра, тој ќе се води како автор на играта, но материјалните права на авторското дело ќе ѝ ги пренесе на Народната банка. Вработени од Народната банка ќе соработуваат со сите автори коишто ќе достават идејни решенија, ќе ги насочуваат авторите во однос на содржината и текстуалниот дел во игрите за да можат заеднички, преку консултации, да го развијат конечниот производ (едукативната игра). Идејните решенија за видовите едукативна игра им се оставаат на имагинацијата на авторите. Сите автори коишто ќе ја завршат втората фаза ќе треба да ѝ ги предадат изворниот код, правата на користење и материјалните права на авторското дело на Народната банка.
Право за учество на Конкурсот имаат државјани на Република Македонија на возраст до 35 години. Вработените на Народната банка немаат право на учество на Конкурсот.
Еден учесник има право да достави повеќе едукативни игри со различни идејни решенија во поглед на изработката, темата, платформата и др., но може да биде награден само со една награда.
На избраните автори ќе им се додели награда за едукативна игра (веб/мобилна апликација), и тоа: за прво место 50.000,00 денари, нетo; за второ место 25.000,00 денари, нето; и за трето место 15.000,00 денари, нето. Наградата не претставува авторски хонорар.
Едукативни игри од овој вид (веб/мобилна апликација) што може да послужат само како пример, може да се видат на следниве линкови:
http://ec.europa.eu/economy_finance/netstartsearch/euro/kids/index_en.htm;
http://www.practicalmoneyskills.com/play/peter_pigs_money_counter;
http://www.euro.fi/finanzity/.
Содржина на едукативната игра:
Играта може да имаат најразлична содржина без ограничувања, со тоа што треба да се запазат одредени елементи по препорака на Народната банка, а тоа се:
- игрите пред сè треба да бидат едукативни - примарната функција на игрите треба да биде едукацијата и тоа од областа на финансиите;
- да содржат економски и финансиски термини било во пишан текст, било во слика;
- да не поседуваат агресија, насилство, коцкање, пороци и други неморални вредности;
- доколку се користи валута во играта, да биде застапен денарот како национална валута.
Карактеристики на едукативната игра:
- Јазик на играта: Играта да биде изработена на гласовен и/или текстуален македонски јазик и алтернативно да постои опција за промена на други јазици, албански и англиски јазик;
- Употреба на играта: Примарно да може да се употребува со воспоставување интернет-врска (онлајн) од страна на корисниците, или алтернативно да може да има мобилна апликација за Android или iOS, како и онлајн следење на резултати што ќе ги освојуваат корисниците преку играње на играта;
- Тип и категорија на игра: Играта може да биде која било од наведените или комбинација на следните категории (едукативна, акција, стратегија, авантура, ролплеј (RPG), сложувалка).
- Веб-апликацијата треба да работи уредно на прелистувачите Internet Explorer 11, Edge, Chrome и Firefox.
- Веб-апликацијата се препорачува да се направи со HTML5, CSS3, JavaScript и останати JavaScript библиотеки, не се препорачува Flash, но и не се исклучува.
- Веб-апликацијата да има адаптивен кориснички интерфејс.
Критериум за избор:
- Можност за користење на повеќе уреди
- Квалитет
- Кориснички интерфејс
- Онлајн следење
Пријавите од авторите, со нивните лични податоци и контакт, треба да бидат доставени електонски на ЦД или УСБ преку архивата на Народната банка со назнака: за Конкурс за избор на најдобра едукативна игра.
Краен рок за доставување на едукативните игри е 13 март 2018 година.
Пристигнатите идејни решенија и конечни производи ќе ги разгледува и оценува посебна комисија формирана од Народната банка.
Наградите ќе бидат доделени по завршувањето на Конкурсот на јавен настан во организација на Народната банка.
Народната банка ќе ги постави наградените едукативни игри на интернет-страницата на Народната банка.