Конференција на високо ниво

НОВА НОРМАЛА?

ГЛОБАЛНА ЕКОНОМСКА ЕКСПАНЗИЈА, ДИНАМИКА НА ИНФЛАЦИЈАТА, ФИНАНСИСКА СТАБИЛНОСТ И ЗНАЧЕЊЕТО ЗА УПРАВУВАЊЕТО СО ФИНАНСИСКИ СРЕДСТВА ВО МЕЃУНАРОДНИ РАМКИ

Народната банка на Република Македонија (НБРМ), во соработка со Комитетот за преобразување на Бретон Вудс од Париз, Франција  (The Reinventing Bretton Woods Committee - RBWC) организира меѓународна конференција на којашто фокусот на учесниците ќе се насочи кон најновите трендови и предизвици во врска со монетарната политика, финансиската стабилност и управувањето со финансиските средства во целина.

Конференцијата ќе се одржи на 16 февруари 2018 година во Мериот хотел, Скопје, Република Македонија.

Целта на Конференцијата е да се оценат тековната состојба и идните изгледи на глобалната економија, и во тој контекст, да се открие со кои предизвици се соочуваат централните банки при остварувањето на нивните цели за одржување на ценовната и на финансиската стабилност. Вниманието на Конференцијата ќе се насочи кон посткризните движења на финансиските пазари во развиените и во економиите во развој, отпорноста на финансискиот систем и промените во регулативата од страна на централните банки. Дискусиите во текот на Конференцијата ќе се обидат да дадат одговор на тоа како реагираа и се позиционираа раководителите на финансиски средства во услови на спротивна поставеност на монетарните политики на глобалните централни банки и како се подготвуваат овој тип инвеститори за постепено усогласување на монетарните политики. Исто така, на Конференцијата се предвидуваат и дискусии околу идната интеграција на земјите од Југоисточна Европа, со осврт на досегашните постигнувања и идните предизвици пред овие економии.

Конференцијата е наменета за претставници на централните банки, меѓународните финансиски институции, глобалните банки и домашните финансиски и инвестициски институции. На конференцијата се очекува присуство на високи претставници на релевантни меѓународни финансиски институции, академскиот свет и глобалните банки, како и гувернери на централните банки, што ќе овозможи плодотворни дискусии и размена на искуства на сите учесници.

Потврдени панелисти:

• г. Беноа Кере, член на Извршниот одбор на Европската централна банка (ЕЦБ)
• г. Тао Џанг, заменик главен директор на Меѓународниот монетарен фонд (ММФ)
• г. Луиз Авазу Переира да Силва, заменик главен директор на Банката за меѓународни порамнувања (БИС)
• г. Џонатан Пингл, извршен директор, раководител на економскиот оддел за глобални инвестиции со фиксен принос (БлекРок)
• г. Мар Гудмундсон, гувернер на Централната банка на Исланд
• г-а Дебора Револтела, директор на Дирекцијата за економски прашања во Европската инвестициска банка (ЕИБ)
• г-а Шарлот Рух, директор за земјите од ЦЕСЕЕ при Европската банка за обнова и развој (ЕБРД)
• г. Карло Монтичели, вицегувернер, Банка за развој при Советот на Европа
• г-а Линда Јуех, соработник за економија во „Сент Едмунд хол“, Универзитет Оксфорд, вонреден професор по економија во Лондонската школа за бизнис 
• г. Драган Тевдовски, министер за финансии во Владата на Република Македонија
• г. Владислав Горанов, министер за финансии, Република Бугарија
• г. Мојмир Хампл, вицегувернер на Чешката народна банка 
• г. Томас Гарбаравичиус, член на Советот на Банката на Литванија 
• г. Петер Муслехнер, извршен директор и член на Советот на Австриската народна банка (ОеНБ)
• г. Масимилиано Кастели, главен директор во УБС за управување со финансиски средства 
• г-а Џенифер Џонсон Калари, директор на „Џеј-џеј-си адвајзори“, основач и поранешен директор на РАМП, Светска банка
• г-а Изабел Штрос Кан, главен финансиски соработник во Светската банка, поранешен директор во Банката на Франција
• г. Марк Узан, директор на Комитетот за преобразување на Бретон Вудс