Shkup, 11 prill 2025                                                

“Hulumtimet tregojnë se rritja e globalizimit ka pasur ndikim pozitiv në normat e aktivitetit të grave, që do të thotë se vendet me hapje më të madhe tregtare kanë nivel më të lartë të barazisë gjinore. Sipas Raportit të Bankës Botërore, firmat eksportuese punësojnë më shumë gra - gratë përbëjnë një të tretën e fuqisë punëtore në krahasim me më pak se një të katërtën në firmat joeksportuese, dhe në veçanti më shumë punësojnë firmat me pronësi të huaj dhe firmat pjesëmarrëse në zinxhirët global të furnizimit, ku gratë marrin pjesë me 37%, përkundër firmave që nuk janë pjesë e këtyre zinxhirëve të furnizimit (25%).Prandaj, vlerësohet se deglobalizimi jo vetëm që mund të reduktojë ndjeshëm PBB-në totale botërore, në varësi të intensitetit dhe kanaleve të ndikimit, madje deri në 12%, por mund të ketë edhe ndikim më të pafavorshëm për gratë. “ Këtë e theksoi guvernatorja Anita Angellovska-Bezhoska në ligjëratën e saj para studentëve të “Kolegjit Amerikan”, si anëtare nderi e “Delta Mu Delta Pi Alfa – Shkup”.

“Gratë përbëjnë gjysmën e popullsisë së botës, por janë dukshëm më pak të përfshira në rrjedhat ekonomike, gjë që është veçanërisht e rëndësishme për vendet si e jona me mungesë të fuqisë punëtore. Sipas Raportit të Forumit Ekonomik Botëror, ndarja gjinore mbetet sfidë në mbarë botën, por edhe në rajonin tonë, duke përfshirë edhe ekonominë e Maqedonisë. Vlerësohet se nëse progresi vazhdon me ritmet aktuale, do të duhen 131 vjet për të arritur barazinë gjinore”, theksoi guvernatorja e cila tha se për të arritur progres të tillë nevojiten reforma thelbësore: tejkalimi i barrierave institucionale, rregullatore dhe kulturore, politika që do të nxisin përfshirjen e grave në tregun e punës, mbështetje për gjetjen e ekuilibrit në përgjegjësitë familjare dhe të punës dhe mundësi të barabarta për zhvillimin e karrierës dhe lidershipit.

Ligjërata, e cila u trajtua edhe nga zëvendës rektorja për arsim, Venera Krliu, hapi edhe një diskutim me studentët dhe anëtarët e “Delta Mu Delta Pi Alfa”, të cilët i drejtuan guvernatores pyetje, kryesisht për zhvillimin e karrierës së saj dhe sfidat e postit që mban, si dhe për çështjen më aktuale për momentin, që ka të bëjë me tarifat amerikane dhe ndikimin e tyre në ekonominë vendase dhe investimet e huaja direkte.