„Финтек“ е кратенка од зборовите „финансиска технологија“. Таа стана моќен двигател на иновациите во светот на финансиите и има потенцијал да ги трансформира финансиските услуги. Како и многу други примери на генерички термини, овој термин може да има различни значења во зависност од контекстот. Финтек може да се однесува на почетни бизниси или основани компании кои работат во финансискиот сектор и компании кои имаат деловни модели засновани на иновативни технологии. Сепак, терминот „финтек“ може да се однесува и на самите технологии, без оглед дали ги применуваат новите компании или пак традиционалните учесници на пазарот, како на пример банките коишто го истражуваат нивниот потенцијал.

Пример за формално дефинирање на финтек може да биде дефиницијата дадена од Одборот за финансиска стабилност: „технолошки овозможена финансиска иновација што може да доведе до нови деловни модели, апликации, процеси или производи со придружен материјален ефект врз финансиските пазари и институции и обезбедувањето финансиски услуги”.

Самата технологија го олеснува пристапот на многу производи и/или услуги коишто традиционално ги нудат банките или другите финансиски институции. Дозволете ни да дадеме неколку примери. Постојат нови видови платежни институции - даватели на услуги за иницирање плаќања (англ. Payment Initiation Service Providers - PISP) кои треба да понудат нови начини за извршување на плаќањата. Исто така, постојат платформи за капитално финансирање или заеми (англ. crowdfunding platforms), кои можат да станат алтернативен извор на финансирање на компаниите и / или потрошувачите. Робосоветниците (англ. robo-advisors) можат да понудат придобивки за малите инвеститори, обезбедувајќи автоматски решенија за управување со портфолио. Aгрегаторите во електронската трговија (англ. E-commerce aggregators) стануваат популарни дистрибутери на различен вид финансиски услуги и / или вести. Компаниите кои користат анализи врз основа на големи бази на податоци (англ. big - data analysis) може да обезбедат нови процеси на кредитно бодирање, како поддршка на кредитната функција на традиционалните кредитори.

Темпото на усвојување на финансиски технологии драматично се зголеми, што значи дека нивното влијание врз пазарот за традиционалните финансиски услуги може да биде поголемо и побрзо отколку во минатото.

Финтек го олеснува пристапот до финансиски услуги, така што стануваат попогодни за корисниците. Исто така, може да ја зголеми оперативната ефикасност на финансиските компании и со намалување на бариерите за влез на нови учесници на пазарот, може да ја стимулира конкуренцијата и придобивките за потрошувачите. Сепак, за да се остварат овие придобивки, клучен услов е развој и одржување на довербата во услугите, засилување на сите напори за обезбедување интегритет и флексибилност на ИТ-системите, обезбедување задоволителна заштита на податоците и овозможување отворени, фер и транспарентни пазари. (назад)